Ширкати имдодгарони Кумитаи ҳолатҳои фавқулодда дар хомӯш кардани сӯхтори бозори “Султони Кабир”

Чоп шуд: 25/01/2021 | admin

Ба Раёсати Кумитаи ҳолатҳои фавқулодда ва мудофиаи граждании назди Ҳуку мати Ҷумҳурии Тоҷикистон хабари сӯхтор дар яке аз калонтарин бозорҳои пойтах – бозори “Султони Кабир” соати 07:27 дақиқаи рўзи 25 январи соли 2020 расид. Ва ба тариқи фаврӣ ба ҷойи ҳодиса воҳидҳои дахлдор ҷиҳати ширкат дар хомӯш кардани забонаи оташ равон карда шуданд.

Дастаи махсуси зудамали наҷотдиҳии Раёсати Кумитаи ҳолатҳои фавқулодда ва мудофиаи гражданӣ дар шаҳри Душанбе бо ду адад техникаи махсус дар ҳайати 12 нафар,  ҳайати шахсии Раёсати шаҳри Душанбе бо як адад техникаи махсус дар ҳайати 10 нафар ва аз Раёсати Хадамоти таъиноти махсусгардонидашудаи кофтукобиву наҷодиҳии Кумита бо  чор  адад  техника дар ҳайати 15 нафар сафарбар карда шудаанд.

Маврид ба зикр аст, ки наҷотдиҳандагони Раёсати шаҳри Душанбе ва Раёсати Хадамоти таъиноти махсусгардонидашудаи кофтукобиву наҷотдиҳии Кумита дар якҷоягӣ бо ҳайати  шахсии  хадамоти оташнишонии шаҳри Душанбе ва ноҳияҳои он кору фаъолият намуда, аз мағозаҳои оташзада  молу амволи соҳибкоронро ба ҷои бехавф  бароварда,  ба хомўш намудани алангаи оташ кўмак расониданд.

Дар хомӯш кардани сӯхтор 16 автомашинаи оташнишонии ВКД бо 348 нафар кормандони оташнишонӣ ва 200 кормандони дастаи таъиноти махсус, РВКД дар шаҳри Душанбе барои таъмини тартибот сафарбар карда шуданд.

Бино ба маълумоти пешакии Вазорати корҳои дохилии Тоҷикистон дар натиҷаи андешидани чораҳои лозимӣ, оташ соати 9.30 пурра хомӯш карда шуд. Ин манбаъ зарари расида аз оташсӯзиро тахминан 800 ҳазор сомонӣ эълон кард ва дар хабар гуфта мешавад, ки  аз оташ молу маҳсулоти мардум ба маблағи зиёда аз 2 млн. сомонӣ эмин дошта шуд.

Оид ба ҳодисаи сӯхтор парвандаи ҷиноятӣ оғоз карда шуда, сабабу омилҳо ва зарари аниқи оташ муайян карда мешавад.

О.Фахриддинзода

МАТОЛИБИ ҲАМСОН

 

барчасп: 
Ахбори рӯз
Раёсати Душанбе
  • 1255 нафар хонд