То 9 июли соли 2019 ба асари риоя накардани қоидаҳои шиноварӣ дар кишвар 64 нафар ба ҳалокат расидаанд, ки 28 нафари онҳо то 16-сола, синни 36 тани онҳо болотар аз 17 сола мебошанд. Кумитаи ҳолатҳои фавқулодда ва мудофиаи граждании назди Ҳукумати Ҷумҳурии Тоҷикистон ба сокинон ва меҳмонони кишвар ҳушдор медиҳад: ҳангоми оббозӣ қоидаҳои шиновариро ҷиддан риоя кунед!
Бо мақсади пешгирӣ аз ҳодисаҳои нохӯш дар махзанҳои об кормандони Кумитаи ҳолатҳои фавқулодда ва мудофиаи граждании назди Ҳукумати Ҷумҳурии Тоҷикистон ба роҳандозии корҳои таблиғотӣ дар маконҳои истироҳати умумии одамон дар соҳили рӯдхонаҳо ва тафреҳгоҳҳо идома медиҳанд.
Ҳамин тариқ, кормандони Раёсати КҲФ дар шаҳри Душанбе ва вилояти Хатлон якҷо бо намояндагони Вазорати корҳои дохилӣ дар соҳилҳо ва маконҳои тафреҳӣ чандин рейд гузарониданд, ҳамчунин нишонҳои манъкунандаи оббозӣ, лавҳаҳои иттилоттӣ часпониданд, китобчаву варақаҳои таблиғотӣ тақсим намуданд.
Мутаассифона, иддае аз шаҳрвандон нисбат ба амнияти худ бепарвоянд. Дар ҳоле, ки инсонҳо бояд ҳамеша барои ҳифзи ҷони худу пайвандону атрофиёнашон кушо бошад. Набояд кӯдакон ва наврасонро танҳо ва беназорат дар соҳили обҳо гузоред.
Шаҳрвандон ба тафреҳгоҳҳои ғайрирасмиву беиҷозат мераванд ва бо ин васила ҳаёти худ ва атрофиёни худро зери хатар мегузоранд. Имрӯзҳо, ки дар кишвар таътили тобистана ҳукмфармост, аксари бачаҳо ба ҳоли худ гузошта шудаанд. Калонсолон бояд дар ғами хурдон бошанд, масъулияти таъмини амнияти онҳо ба уҳдаи волидон ва пайвандони бузургсол аст.
То 9 июли соли 2019 ба асари риоя накардани қоидаҳои шиноварӣ дар кишвар 64 нафар ба ҳалокат расидаанд, ки 28 нафари онҳо то 16-сола, синни 36 тани онҳо болотар аз 17 сола мебошанд.
КҲФ як бори дигар ба сокинони мамлакат ва меҳмонони кишвар ҳушдор медиҳад:
- танҳо дар ҷойҳое оббозӣ кунед, ки муҷаҳҳаз гардонида шудаанд;
- кӯдаконро беназорат нагузоред;
- агар шумо шиноварӣ наметавонед, пас набояд ба обе, ки аз зонуи шумо болост, ворид шавед;
- дар об на бештар аз 15-20 дақиқа бимонед, зеро аз ин бештар метавонад боиси рагкашӣ шавад;
- аз соҳили ноошно ба об паридан қаъиян манъ аст;
- шинокунон аз соҳил дур наравед, ки шояд барои бозгашт ба соҳил қувваатон нарасад;
- дар об ҳамдигарро доштан, аз пойи ҳамдигар қапидан, якдигарро тарсонидан ва ё тела додани шарикон ба умқи обҳо манъ аст;
- агар дар мавҷ андармон шудед, талош накунед бо он мубориза баред, хуб аст, ки ба самти соҳил ҳаракат кунед.
Дар ҳоли сархӯшӣ аз машрубот оббозӣ накунед!
Дар хотир дошта бошед, ки амнияту бехатарии шумо ва наздиконатон дар дасти худи шумост!
Телефонҳои хадамоти наҷот: «112» ва ё 93 880 28 19
