Боз ду гардишгари хориҷӣ бо талоши кормандони наҷоти Кумитаи ҳолатҳои фавқулодда аз хатар наҷот дода шуданд. Ин ду тан зану шавҳар аз Лаҳистон будаанд, ки бо мошин бо убур аз роҳи Мурғоб мехостанд ба шаҳри Оши Ҷумҳурии Қирғизистон расанд. 3 октябри соли 2019 тахминан соати  14:00 ба қисми навбатдории Кумитаи ҳолатҳои фавқулодда ва мудофиаи граждании назди ҳукумати Ҷумҳурии Тоҷикистон хабар расид, ки тахминан дар наздикии ноҳияи Қаракӯл ва Мозкӯли ноҳияи Мурғоби ВМКБ ду сайёҳони лаҳистонӣ сигнали  «SOS» равон карданд.

Ба муносибати Рӯзи забони давлатӣ дар Кумитаи ҳолатҳои фавқулодда ва мудофиаи граждании назди Ҳукумати Ҷумҳурии Тоҷикистон  мулоқоти ҳайати шахсӣ бо муовини Раиси Кумитаи забон ва истилоҳоти назди Ҳукумати Ҷумҳурии Тоҷикистон Саодатшо Матробиён баргузор шуд. Зимни суханронии худ Саодатшо Матробиён аз ҷумла гуфт, ки забон сарвату боигарии ҳар халқ аст ва маҳз ин забони модарист, ки халқҳоро ба ҳам меорад ва ҳамкориҳои миллатҳои гуногунро тақвият мебахшад. 

Дар Раёсати Кумитаи ҳолатҳои фавқулодда ва мудофиаи граждании назди Ҳукумати Ҷумҳурии Тоҷикистон дар вилояти Хатлон ҷаласаи ҷамъбасти нуҳ моҳи фаъолияти Раёсат баргузор гардид, ки дар он муовини Раиси Кумита полковник М. Салимзода ширкат намуд. Дар ҷараёни ҷаласа ҳисоботи роҳбарони воҳидҳои Раёсат шунида шуд. Полковник М.Салимзода зимни суханронии худ ба камбудиҳо дар кори як қатор сарварони  шуъбаҳо ишора кард ва барои бартараф намудани он вақт муайян намуд.  Дар ин ҷаласаи диққати асосӣ ба омодагиҳо ба давраи тирамоҳ ва зимистон равона шуд.

Бо мақсади татбиқи Созишномаи байнидавлатӣ миёни Ҷумҳурии Тоҷикистон ва Ҷумҳурии Ӯзбекистон дар бораи ҳамкориҳо дар самти пешгирӣ ва бартарафсозии ҳолатҳои фавқулода ва қарори мушовараи муштараки КҲФ ҶТ ва ВҲФ Ҷуумҳурии Ӯзбекистон 28 сентябри соли 2019 Кумитаи ҳолатҳои фавқулодда ва мудофиаи граждании назди Ҳукумати Ҷумҳурии Тоҷикистон бори аввал мушоҳидаи муштараки аэровузалии ҳавзи дарёи Шинг гузаронида шуд.

Бо мақсади татбиқи минбаъдаи Ёддошти тафоҳум “Дар бораи ҳамкориҳо дар самти омодагиҳо, бартарафсозӣ ва коҳиши хатари офатҳо, ҳамчунин мутобиқшавӣ ба тағйири иқлим”, ки ҳануз моҳи майи соли 2017 миёни Кумитаи ҳолатҳои фавқулодда ва мудофиаи граждании назди Ҳукумати Ҷумҳурии Тоҷикистон ва Барномаи Озуҷавории Умумиҷаҳонии СММ имзо шуда буд, имрӯз дар КҲФ маросими таҳвили техникаи навбатӣ доир гардид.