Бар асари боришоти зиёд дар роҳҳои кӯҳии Тоҷикистон хавфи фаромадани тарма боқӣ мемонад. Ҳамин тариқ, 2 марти соли 2025 аз км 62 то 72 шоҳроҳи Душанбе-Варзоб ёздаҳ ҳолати фаромадани тарма ба қайд гирифта шуд.
Ҳангоми фаромадани тарма 8 мошин – 6 мошини сабукрав ва ду мошини боркаш зери тарма мондаанд. Бо талоши наҷотдиҳандагони навбатдор ва кормандони хадамоти роҳдории IRS сари вақт кумак расонида шуда, одамон наҷот дода шуданд.
Барои тоза кардани роҳ хадамоти роҳдории IRS, наҷотдиҳандагони КҲФ ва кормандони ВКД, ки шабонарӯзӣ навбатдорӣ доштанд, корҳои рафъи офати табиӣ анҷом доданд. Роҳи Душанбе-Хуҷанд муваққатан баста шудааст.
Барои таъмини бехатарии ронандагон дар шоҳроҳи зимистона ва расонидани ёрии таъҷилӣ дар ҳолатҳои изтирорӣ посбонии роҳ аз ҷониби наҷотдиҳандагони дастаҳои зудамали Кумита идома дорад.
КҲФ бори дигар аз мардум даъват мекунад, ки аз сафар ва рафтан ба минтақаҳои фаромадани тарма худдорӣ намуда, ҳушёру эҳтиёткор бошанд.
