Кумитаи ҳолатҳои фавқулодда ва мудофиаи граждании назди Ҳукумати Ҷумҳурии Тоҷикистон бо истинод ба ҳавошиносони кишвар хабар медиҳад, ки то 4 марти соли 2025 бар асари боришот дар баъзе минтақаҳои доманакӯҳӣ ва ноҳияҳои кӯҳии вилояти Суғд, ноҳияҳои тобеи ҷумҳурӣ, инчунин дар шоҳроҳи Душанбе-Хуҷанд-Чаноқ (км 62-74) ва дар ғарби Вилояти мухтори кӯҳистони Бадахшон хавфи баланди фаромадани тарма боқӣ мемонад.
Бинобар ин, Кумита бори дигар аз аҳолӣ хоҳиш мекунад, ки то ҳадди имкон аз сафар намудан ба минтақаҳои хавфнок, ҷамъоварии ҳезум, гиёҳҳои шифобахш ва шикор худдорӣ намоянд. Ронандагонро зарур аст, ки ҳангоми ҳаракат дар минтақаҳои куҳӣ ва ё дар мавзеъҳои аз тарма хавфнок бояд фосилаи муқарраршудаи байни мошинҳоро қатъиян риоя кунанд. Дар роҳҳо бодиққат ва эҳтиёт бошед.
Илова бар ин, Кумита аз сокинони минтақаҳои кӯҳӣ ва доманакӯҳӣ хоҳиш мекунад, ки ба ҳолати бомҳои худ таваҷҷӯҳ зоҳир кунанд. КҲФ ба соҳибони хонаҳои истиқоматии якошёна тавсия медиҳад, ки барфу яхи ҷамъшударо мустақилона тоза кунанд, то бомҳо осеб набинанд.
Волидони мӯҳтарам, ки дар минтақаҳои зери тарма истиқомат мекунанд! Кӯшиш кунед, ки кӯдаконро беназорат нагузоред. Агар онхоро танҳо ба мактаб ё ба сайру гашт мефиристед, аз хавфи фаромадани тарма ва сангреза огоҳ карда, бо онхо суҳбат кунед. Ҳаёти худ ва наздиконатонро дар хатар нагузоред!
Агар Шумо шоҳиди ҳодиса бошед, ба хадамоти наҷотдиҳии КҲФ занг занед:
112
2231311
2219119
938802819
