Сообщение об ошибке

Deprecated function: The each() function is deprecated. This message will be suppressed on further calls в функции menu_set_active_trail() (строка 2405 в файле /var/www/vhosts/khf.tj/httpdocs/includes/menu.inc).

ОБ. МУЪҶИЗА БОЯД ПОК БОШАД

«Об муъҷизаи бебаҳои табиат ва асоси пайдоишу пойдории олам аст», - навиштааст Арасту, олими забардасти Юнони Қадим. Сарсабзиву шукуфоӣ ва пойдории олам ба об марбут аст. Бешубҳа, дар он ҷое, ки об аст, ҳаёт, ободӣ ва хушбахтӣ низ ҳаст. Ниёгони мо обро чун неъмати муқаддасу пок парастиш менамуданд, яъне аз ибтидо об ба сифати неъмати поку равшан ва атокунандаи бахту иқбол шинохта шудааст.
Рангорангии табиати сеҳрангез, хандаи гулҳои тар, сабзиши рустанӣ, навои обшор, мавҷи сабзи талу теппаҳо ба шарофати ин неъмати беназир имконпазир мегардад.

Имрӯз бо сабабҳои объективӣ ва субъективӣ ниёзи ҷомеаи башарӣ ба об афзуда, ҳамзамон, норасоии он дар баъзе кишварҳо боиси ранҷу машаққати мардум гардидааст. Аз ин хотир, Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон борҳо аз минбарҳои баланди байналмилалӣ барои ҳалли мушкилоти марбут ба об масъалагузорӣ намудаанд. Созмони Милали Муттаҳид ва ҷомеаи ҷаҳонӣ ташаббусҳои Президенти Ҷумҳурии Тоҷикистонро дастгирӣ намуданд. Ҳамин аст, ки соли 2003 «Соли оби тоза», солҳои 2005 – 2015  Даҳсолаи байналмилалии амалиёти «Об барои ҳаёт», соли 2013 «Соли байналмилалии ҳамкорӣ дар соҳаи об» ва солҳои 2018 - 2028 Даҳсолаи байналмилалии амал «Об барои рушди устувор» эълон гардиданд.

Тоҷикистон аз ҷиҳати дороии об дар ҷаҳон яке аз ҷойҳои намоёнро ишғол менамояд, ки ин, бешубҳа, бахти мост. Кӯлу дарёҳои ҷумҳурӣ дар пешбурди соҳаҳои хоҷагии халқ ва зиндагии мардум нақши муассир доранд. Аммо баъзе шаҳрвандон дидаю дониста ба об ҳар гуна партовҳо мепартоянд ва онро ифлос месозанд. Набояд фаромӯш кард, ки ҳифзи сарватҳои табиат вазифаи ҳар фарди ватандӯст аст. Мо бояд обро сарфакорона истифода бурда, соф нигоҳ дорем ва ба дигарон низ ин амалро талқин намоем. 
Субҳ бо нур оламро мунаввар мегардонад, вале об вуҷуди оламу одамро поку равшан менамояд. Пас «Об - рӯшноӣ» гуфтани халқ ҳикматест, ки инсониятро баҳри ҳифзи ин неъмати бебаҳо ҳидоят месозад.
Имрӯз ҳар яки моро мебояд, ки ҷавононро, пеш аз ҳама, дар рӯҳияи ватандӯстӣ, худшиносии миллӣ ва ҳимояи сулҳу ваҳдати миллӣ, ҳамчунин, ҳифзи сарватҳои табиӣ, ки ҷузъи ватандорист, тарбият намоем ва дар амалисозии ҳадафҳои Даҳсолаи байналмилалии амал «Об барои рушди устувор» ҳиссаи сазовор гузорем.

Сафаралӣ НАЗАРОВ,

нафақагири 80 – сола, 
Аълочии маорифи Тоҷикистон, 
раиси собиқадорони ҷангу меҳнати 
Ҷамоати деҳоти Чагами ноҳияи Ш. Шоҳин

БОЗЧОП: рузномаи «Ҷумҳурият» 22.08.2018    №: 166