Бино ба гузориши Раёсати Кумитаи ҳолатҳои фавқулодда ва мудофиаи граждании назди Ҳукумати Ҷумҳурии Тоҷикистон дар вилояти Хатлон рӯзи гузашта, 25-уми март соати 16:14 дақиқа вақти маҳаллӣ дар кӯчаи “1-уми Май”-и шаҳри Кӯлоб як садамаи мудҳиши мошин рух додааст.

Як мошини боркаши “Дулан”, ки аз ҷониби як сокини 39-солаи деҳаи Заргари шаҳри Ваҳдат идора мешуд, ҳангоми ҳаракат аз ноҳияи Шамсиддин Шоҳин ба самти шаҳри Кӯлоб ба дарахти канори роҳ бархӯрда, чаппа шудааст. Сабаби ин садама аз уҳдаи идораи мошин набаромадани ронанда гуфта шудааст.

Дар мошин ғайр аз ронанда боз ду мусофири дигар менишастанд, ки ҳарду бар асари ин ҳодиса ҷон бохтанд. 

Наҷотдиҳандагони бахши Раёсати КҲФ дар Кӯлоб ба зудӣ ба ҷойи ҳодиса расиданд ва бо истифода аз таҷҳизоти махсус ҷасади мусофиронро аз дохили мошини чаппашудаву харобгардида берун оварданд ва ба мақомоти ҳифзи ҳуқуқ супурданд.

Ронанда бо ҷароҳатҳои шадиду вазнин ба бемористони шаҳр интиқол дода шуд. 

Дар ҳамин иртибот Кумитаи ҳолатҳои фавқулодда ва мудофиаи граждании назди Ҳукумати Ҷумҳурии Тоҷикитсон як бори дигар ба ронандагон ёдрас мешавад, ки ҳангоми ҳаракат дар роҳҳо қоидаҳои бехатариро ҷиддан риоя кунанд.

Эҳтимолан як сабаби ин бархӯрди марговари “Дулан” ба дарахт, суръати баланди ҳаракати мошин буд, ки ронанда натавонист аз уҳдаи идораи он барояд.

Суръати баланди ҳаракат ва риоя накардани қоидаҳои амнияту бехатарӣ ҳамеша сабабгори садама ва марги одамон мешавад.

Ҳаёти худ ва ҳамсафарони худро эҳтиёт кунед!