Вазорати тандурустии Тоҷикистон аз ифшои 61 бемори нави гирифтори коронавирус КОВИД-19 хабар дод. Манбаъ мегӯяд аз 30 апрел то соати 18:00 дақиқаи 17 июн дар мамлакат 5221 нафар бо ташхиси сирояти коронавируси нави COVID-19 ошкор гардида ва то кунун аз ин беморӣ 3700 (70.8%) нафар шифо ёфтаанд. Ҳамзамон, то санаи зикргардида дар мамлакат аз ин беморӣ 51 нафар фавтидаанд.
Вазорати тандурустӣ ва ҳифзи иҷтимоии аҳолии Ҷумҳурии Тоҷикистон дар иттилоияи ахиран расонаикардаи худ навиштааст, ки 17 июн дар мамлакат 310 нафар зери назорати табибон қарор дошта, дар як шабонарӯзи охир 76 нафар пас аз шифо ёфтан ба хонаҳояшон рухсат дода шуданд.
Дар ҳам ин ҳол сомонаи Вазорати тандурустии Тоҷикистон хабар дод, ки Муассисаи давлатии Маркази ҷумҳуриявии таълимию клиникии «Кори ҳамширагӣ»-и Вазорати тандурустӣ ва ҳифзи иҷтимоии аҳолии Ҷумҳурии Тоҷикистон ҷиҳати пешгирӣ ва мубориза бо коронавируси СOVID-19 ба шаҳрвандони мамлакат дарсҳои кӯтоҳмудати омӯзишии ройгонро ба роҳ мондааст.
Минбаъд шаҳрвандон метавонанд дар рӯзҳои кории ҳафта аз соати 09:00 то 18:00 ба марказ муроҷиат намуда, доир ба бемории СOVID-19, сабабҳои паҳншавӣ ва роҳҳои пешгирии он маълумот бигиранд ва ё бо рақами 235 72 62 дар тамос бошанд. Мутахассисоне, ки дар марказ ба шаҳрвандон дарс мегӯянд, дорои таҷрибаи хуби корӣ буда, дар хориҷи кишвар такмили ихтисос намудаанд. Ҳамзамон, марказ бо дастгоҳҳои муосири тиббӣ муҷаҳҳаз буда, дорои Серетификати дараҷаи олӣ мебошад.
Ҳамзамон, ҷиҳати мубориза бар зидди бемории сироятии СOVID-19 ва табобати сироятёфтагон ду маркази машваратии тиббии Вазорати тандурустӣ ва ҳифзи иҷтимоии аҳолии мамлакат таҳти рақамҳои кӯтоҳи 311 ва 511 низ фаъол мебошанд. Ин рақамҳои телефони боварии вазорат ба таври шабонарӯзӣ фаъол буда, мутахассисони пуртаҷриба ба саволҳои марбут ба ҳифзи саломатӣ, дар сурати тағйир ёфтани вазъи саломатӣ чӣ кор кардан, ба куҷо муроҷиат намудан ва кадом ташхисҳоро супурдан ҷавоб мегӯянд. Инчунин, тавассути ин рақамҳо дигар маълумоти мубрами рӯзро метавон пайдо кард.
Ёдовар мешавем, ки Ҳукумати Ҷумҳурии Тоҷикистон имрӯзҳо ҷиҳати пешгирӣ ва табобати коронавируси навъи CОVID-19 тамоми тадбир ва чораҳои заруриро амалӣ намуда истодааст. Имрӯзҳо дар 85 беморхонаи ҷумҳурӣ зиёда аз 7 ҳазору 500 табиб ва 25 ҳазор корманди миёнаи тиб сафарбар шудаанд. Ба ғайр аз ин, дар муассисаҳои кумаки аввалияи тиббию санитарии ҷумҳурӣ 7 ҳазору 600 табиб ва зиёда аз 24 ҳазор корманди миёнаи соҳаи тиб бо мақсади дарёфт, пешгирӣ ва расонидани кумаки аввалия ба мардум хизмат мерасонанд.
