Бино ба иттилои Вазорати тандурустӣ ва ҳифзи иҷтимоии аҳолии Ҷумҳурии Тоҷикистон аз 1 феврал то 8 апрел 7 ҳазору 257 нафар шаҳрвандоне, ки аз кишварҳои хориҷӣ ба Тоҷикистон ворид гардиданд, дар беморхонаҳои сироятӣ ва осоишгоҳҳои мамлакат ба карантин фаро гирифта шуданд.
Аз ин шумора то санаи зикргардида 5 ҳазору 243 нафари онҳо ба хонаҳояшон ҷавоб шуда, 2 ҳазору 14 нафари дигар зери назорати карантинӣ қарор доранд.
Ба иттилои манбаъ, то имрӯз дар Ҷумҳурии Тоҷикистон ягон сирояти коронавирус ба қайд гирифта нашудааст.
Бо мақсади пешгирӣ аз сирояти коронавирус имрӯз дар Вазорати тандурустӣ ва ҳифзи иҷтимоии аҳолӣ телефони боварӣ бо рақами 511 ба кор оғоз намуда, шабонарӯзӣ фаъол мебошад. Шаҳрвандон метавонанд дар ҳолати пайдо шудани нишонаҳои ин беморӣ ва дигар ҳолатҳои ба он алоқаманд фавран ба рақами 511 занг зада, ба Вазорати тандурустӣ ва ҳифзи иҷтимоии аҳолии Ҷумҳурии Тоҷикистон хабар диҳанд.
